«Ұлттық ақпараттық технологиялар» АҚ («ҰАТ» АҚ) Мемлекеттік органдардың интернет-ресурстарының бірыңғай платформасы (МО ИРБП) үшін жаңа дизайн әзірлеп, іске қосты. Жаңарту жұмыстары компанияның ішкі ресурстарымен жүргізілді және заманауи ыңғайлылық, қауіпсіздік пен бейімділік талаптарына толықтай сай келеді.

МО ИРБП – мемлекеттік органдардың интернет-ресурстарын орналастыруға арналған технологиялық шешім. Ол сайттардың құрылымы мен мазмұнының бірізділігін, ақпараттың қазақ, орыс және ағылшын тілдерінде қолжетімді болуын, сондай-ақ ақпараттық қауіпсіздік талаптарына сәйкестігін қамтамасыз етеді. Осы платформаның арқасында азаматтар мемлекеттік органдардан өзекті ақпаратты жылдам әрі ыңғайлы форматта ала алады.

Жаңартылған дизайн сайттарды пайдалануды жеңілдетіп, интуитивті түрде түсінікті етті. «ҰАТ» АҚ әзірлеушілері интерфейстің мобильді құрылғыларға бейімделуіне ерекше назар аударды, сондай-ақ ерекше қажеттіліктері бар азаматтар үшін контенттің қолжетімділігіне мән берді.

Айта кету керек, 2020 жылы іске қосылған сәттен бері МО ИРБП платформасына 3 500-ден астам мемлекеттік органның сайты көшірілді. Бұл тек бірыңғай визуалды және құрылымдық стандарттарды енгізіп қана қоймай, әкімшілендіру үдерісін де айтарлықтай жеңілдетуге мүмкіндік берді. 2024 жылы сайттарға 35,6 миллионнан астам рет кіру тіркелсе, 2025 жылдың басынан бері бұл көрсеткіш шамамен 8 миллионға жетті.

Жаңартылған дизайн – МО ИРБП-ны дамытудың маңызды кезеңі. Алдағы уақытта платформаның функционалы кеңейіп, жасанды интеллект технологияларын енгізу жоспарлануда. Бұл бастамалар азаматтар мен мемлекет арасындағы цифрлық өзара әрекеттестікті одан әрі жақсартып, мемлекеттік қызметтерді барынша тиімді және қолжетімді етуге бағытталған.

Сонымен қатар, МО ИРБП – бірыңғай техникалық және дизайнерлік талаптарды ұсынатын конструктор екенін атап өткен жөн. Алайда сайттардың мазмұнын қалыптастыру жауапкершілігі әр мемлекеттік органның құзыретінде қала береді.

https://www.nitec.kz/index.php/kk/news/govkz-dizaynyn-zhanartty-memlekettik-organdardyn-veb-sayttary-yngayly-zhne-kolzhetimdi-boldy?q=/index.php/ru/news/govkz-obnovil-dizayn-sayty-gosorganov-stali-udobnee-i-dostupnee

2025 жылдың 18 сәуірінде Ақмола облысының Ақкөл қаласында Л.Н. Гумилев атындағы Еуразия ұлттық университетінің PARAM BILIM-2 суперкомпьютері салтанатты түрде іске қосылды.
Іс-шараға ҚР Ғылым және жоғары білім вице-министрі Динара Щеглова, Еуразия ұлттық университетінің ректоры Ерлан Сыдықов, «Республикалық ғарыштық байланыс орталығы» АҚ Басқарма төрағасы Мәлік Жүйріктаев, Ақкөл ауданының әкімі Біржан Әбдірахманов, «Қазақтелеком» АҚ компаниясының өкілдері, журналистер, профессор-оқытушылар құрамы және ЖОО ғалымдары қатысты.
Салтанатты рәсімнен кейін іс-шараға қатысушылар «ақылды қаланың» маңызды нысандарының бірі - Республикалық ғарыштық байланыс орталығының (РҒБО) «Ақкөл» ғарыштық байланыс орталығына (ҒБО) барды.
«Ақкөл» ҒБО мамандары қонақтарға геостационарлық орбитада 36 мың шақырым биіктікте орналасқан «Kazsat» байланыс жерсеріктерін басқару қалай жүргізілетнін айтып, көрсетті.
Мұнда, ғарыштық байланыс орталығының конференц-залында Гумилев атындағы ЕҰУ Ақпараттық технологиялар факультеті ұйымдастырған «Қазақстанның цифрлық трансформациясы» ғылыми-практикалық конференциясының Пленарлық отырысы өтті.
Айта кету керек, «РҒБО» АҚ және Гумилев атындағы ЕҰУ Қазақстанның ғарыш саласы үшін кадрлар даярлау бойынша бірнеше жыл ынтымақтастықта. Жыл сайын еліміздің осы жетекші жоғары оқу орнының студенттері «Ақкөл» ғарыштық байланыс орталығы базасында өндірістік практикадан, тағылымдамадан өтеді. Бүгін бұл бағытта тағы бір қадам жасалды.
ЕҰУ ректоры Ерлан Сыдықов пен «РҒБО» АҚ Басқарма төрағасы Мәлік Жүйріктаев «РҒБО» АҚ базасында Ақпараттық технологиялар факультетінің филиалын құру туралы шарт жасасты.
«Біз үшін мамандарды даярлау мәселесі өте маңызды. Бұл кадрлық резервімізді құру, мамандардың біліктілігін арттыру болып табылады. Біз жоғары технологиялық компания екенімізді ескере отырып, ғылым мен өндірісті біріктіру мәселесіне байыпты қараймыз. Еліміздің жоғары оқу орындарымен ынтымақтастықтың табысты тәжірибесі бар», - деп атап өтті М.Жүйріктаев.
РҒБО филиалы факультеттің оқу-ғылыми бөлімшесі болып табылады және оны құрудың мақсаты – оқу процесінің тәжірибелік бағытын күшейту, сондай-ақ бірлескен ғылыми зерттеулер жүргізу және олардың нәтижелерін өндіріске енгізу», - деп толықтырды ЕҰУ Ақпараттық технологиялар факультетінің деканы Шахмаран Сейілов.
Белгілі болғандай, филиал жұмысы кәсіпорын базасында, атап айтқанда «Ақкөл» ғарыштық байланыс орталығында жүргізілетін болады, филиал штаты ЕҰУ факультетінің қызметкерлері мен ғылыми, тәжірибелік және оқытушылық қызмет тәжірибесі бар РҒБО мамандары қатарынан қалыптастырылатын болады.

https://www.gov.kz/memleket/entities/mdai/press/news/details/979971?lang=kk

Құрметті отандастар!

Қазақстан халқының бірлігі мерекесі құтты болсын!

Бұл – мемлекетіміз үшін айрықша мәні бар мейрам.

Жұртымыз ортақ құндылықтарға негізделген жасампаз мақсаттарға жету жолында бар күш-жігерін  жұмылдырып, болашаққа сеніммен қадам басып келеді. Кең байтақ жерімізде түрлі этнос өкілдері өзара келісімде, тату-тәтті өмір сүріп жатыр.

Биыл Қазақстан халқы Ассамблеясының құрылғанына 30 жыл толды. Осы бірегей ұйым әуел бастан еліміздегі бейбітшілік пен татулықтың жаршысына айналды. Ассамблея азаматтарымыздың өзара құрметі мен ырысты ынтымағына сүйеніп, ұлтты ұйыстыруға елеулі үлес қосып келеді.    

Халқымыздың ауызбіршілігі мен тілеулeстігінің арқасында мемлекетіміз дамып, қолға алынған ауқымды реформалар табысты жүзеге асырыла береді.

Еліміз теңдікке, өзара сенімге және мәдени әралуандылықтың жасампаз әлеуетіне арқа сүйеп, ел бірлігін одан әрі нығайта түседі.

Біз жұрт болып жұмыла білсек, кез-келген сынақты еңсеріп, биік белестерді бағындырамыз. Ұлтымыздың арман-мұраты – Әділетті әрі Қуатты Қазақстанды бірге құрамыз.

Баршаңызға бақ-береке тілеймін!

Бірлігіміз бекем, аспанымыз ашық болсын!

https://www.akorda.kz/kz/memleket-basshysy-kasym-zhomart-tokaevtyn-kazakstan-halkynyn-birligi-merekesimen-kuttyktauy-303954

Бүгін ҚР Президенті жанындағы Орталық коммуникациялар қызметінде өткен брифингте ҚР ЦДИАӨМ Жасанды интеллект және инновацияларды дамыту комитетінің төрағасы Ғиззат Байтұрсынов Қазақстандағы жасанды интеллект экожүйесінің дамуы туралы айтты.

 Қазіргі таңда Парламент Мәжілісінің қарауында жасанды интеллект туралы заң жобасы қарастырылуда, ол жасанды интеллект технологияларын дамыту мен қауіпсіз пайдаланудың құқықтық негізін қалайды.

Технологиялық инфрақұрылымды құруға ерекше көңіл бөлінеді. Министрлік суперкомпьютер мен чиптерді құру бойынша жұмыс атқаруда.

ЖИ инфрақұрылымы сонымен қатар ЖИ Ұлттық платформасын қамтиды және мемлекеттік қызметтерге қол жетімділікті жеңілдетуге бағытталған ЖИ агенттерінің 11 прототипін әзірледі.

Министрлік негізгі салаларды: өнеркәсіп, энергетика, медицина, қаржы қамтитын Industrial AI Accelerator бағдарламасын бастады.

Industrial AI Accelerator командаларды іріктеу мен оқытудан бастап пилоттық жобаларды іске асыруға дейінгі кезеңдерді қамтыды: бірінші толқын тау-кенөнеркәсібі, энергетика, медицина, финтех және мемлекеттік секторларында іске асырылды.Қорытындысы бойынша: 116 өтінім берілді, 32 компания акселерациядан өтті, 27 ұшқыш іске қосылды, оның 4-і өз тиімділігін көрсетті және масштабтауға дайын.

Комитет төрағасының айтуынша, alem.ai Халықаралық жасанды интеллект орталығы экожүйенің маңызды бөлігі болады, ол білім беру, ғылыми және кәсіпкерлік бастамаларды біріктіреді. Оның алаңында қоғамдық аймақтар, TUMO мектебі, Tomorrow School, AI кампусы, R&D орталығы және AI Government ахуалдық орталығы болады.

Іс-шара барысында Astana Hub басқарушы директоры Дания Ахметова сөз сөйлеп, ЖИ саласында кадрлық әлеуетті дамыту туралы айтты.

Жасанды интеллект ХХІ ғасырдың жаңа сауаттылығына айналуда, сондықтан бір миллион қазақстандықты ЖИ дағдыларына үйрету адами капиталды дамыту жөніндегі ұзақ мерзімді мемлекеттік стратегияға енгізілген.

"Бес жыл ішінде оқушыларды, студенттерді, мемлекеттік қызметшілерді, бизнес өкілдерін және кең аудиторияны қамту жоспарлануда. Бұл міндетті іске асыруға мемлекеттік органдар, академиялық және жаһандық әріптестер жұмылдырылған. Astana Hub өз кезегінде ЖИ және IT саласында бірқатар білім беру бастамаларын іске асыруда: Tumo, Tomorrow School, QazCoders, деректерді талдау және Python курстары және т.б. Біз мамандарды дайындап қана қоймаймыз – біз жаңа ойлауды, цифрлық мәдениетті, технологияларға жауапкершілікпен қарауды қалыптастырамыз", - деп атап өтті Astana Hub басқарушы директоры Дания Ахметова.

2025 жылға арналған негізгі жоспарлардың ішінде: alem.ai орталығын іске қосу, ЖИ дамыту бойынша кеңесті құру, суперкомпьютерлік кластерді іске қосу және білім беру бағдарламаларын іске қосу, ЖИ стратегиясын бекіту.

https://www.gov.kz/memleket/entities/mdai/press/news/details/978041?lang=kk