Жол картасына цифрлық даму, инновациялар және аэроғарыш өнеркәсібі министрі Бағдат Мусин мен Абай облысының әкімі Абай Нұрлан Ұранхаев қол қойды.

Аймақ басшысы атап өткендей, өңірде цифрландыру, оның ішінде байланыспен қамту және интернетке қосылу мәселелері бар. Бұл мәселелерді шешу бойынша жұмыстар кезең-кезеңімен жүйелі түрде жүргізілуде.

– Өңірде цифрландыруға басымдық берілуде. Облыс әкімдігі мемлекеттік бағдарламалар мен тұжырымдамалар аясында жұмыстар жүргізіп, жобаларды жүзеге асыруда. Цифрландырудың жарқын мысалдарының бірі – «Сергек» жобасы. Сондай-ақ жолаушылар қоғамдық көлікте жол ақысын электронды түрде төлейді. Семейдегі қоғамдық көліктер мұндай жүйемен 100 пайыз қамтамасыз етілген.  Көптеген мәселелер оң шешімін табуда. Бірақ өзекті мәселелердің бірі – ауылдарда интернеттің жоқтығы, – деді Нұрлан Ұранхаев.

Бағдат Мусин алдағы уақытта осындай мәселелер туындамас үшін жаңа шағын ауданның құрылысын жоспарлау кезеңінде қажетті құрал-жабдықтарды орнату үшін алдын ала арнайы орындар қарастыру керектігін баса айтты.

- Кейбір жерлерде іс жүзінде байланыс мүлде жоқ. Операторларға айыппұл салынды, олар үш ай ішінде кемшіліктерді жою шараларын қабылдайды. Құрылысқа жер телімін бөлу және қажетті құрал-жабдықтарды орнатуға байланысты мәселелер туындап отыр. Бұл арада әкімдіктің көмегі қажет. Сондықтан жаңа ықшамаудандарды жоспарлау кезінде жабдықтарды орнататын жер телімдерін алдын ала қарастыру маңызды, – деді министр.

Бағдат Мусиннің айтуынша, жол картасы интернетпен қоса, ұялы байланыс сапасын арттыруды көздейді.

– Бүгінгі таңда 330 елді мекеннің 116-сында интернет пен оптикалық арналар арқылы байланыс жоқ. Бүгін облыс әкімімен бекітілген Жол картасы аясында интернет пен ұялы байланысқа қатысты мәселелерді кезең-кезеңімен шешетін боламыз. Мұнда нақты шаралар қарастырылған. 25 антенна-діңгекті құрылғы орнатылып, 203 елді мекенге оптикалық байланыс желілері тартылады,- деп атап өтті Бағдат Мусин.

Республикада 5 жыл ішінде 560 миллиард теңге кейінге қалдырылған – бұл қаражат қолжетімді интернет жобасын жүзеге асыруға және оны еліміздің ауылдық округтеріне жеткізуге жұмсалады.

https://www.gov.kz/memleket/entities/mdai/press/news/details/562536?lang=kk

Заң жобасында мемлекеттік органдардың функциялары мен әкімшілік рәсімдерді заңнамалық деңгейде шамадан тыс реттеуді жою ұсынылады.

Бұл ретте мемлекеттік және қоғамдық секторды цифрлық трансформациялау жөніндегі негізгі басымдықтарды, сондай-ақ жаһандық технологиялық трендтерді ескере отырып, цифрландыру саласындағы мемлекеттік реттеудің негізгі мақсаттары мен міндеттері қайта қаралатын болады.

Осыған байланысты, заңнамалық деңгейде цифрландыру субъектілерінің құқықтары мен міндеттерін, олардың жауапкершілігін, бақылау және қадағалау функцияларын қозғайтын Конституцияның 61-бабының талаптарына сәйкес жауапты мемлекеттік органдардың негізгі міндеттері мен қағидалары, функциялары айқындалатын болады.

Басқа мәселелер бойынша барлық функцияларды жеделдік үшін уәкілетті органдардың ережелерінде заңға тәуелді деңгейде айқындау ұсынылады.

Бұл уәкілетті органдарға сыртқы және ішкі бизнес-процестерді оңтайландыру, жобалық басқарудың озық тәжірибелері мен цифрлық шешімдерді енгізу жөнінде жедел шешімдер қабылдауға мүмкіндік береді.

Бұл ретте азаматтар мен бизнестің құқықтарын, бостандықтары мен заңды мүдделерін іске асыруға байланысты уәкілетті органдардың барлық қолда бар функцияларына тексеру жүргізілетін болады. 

Тексеру қорытындысы бойынша мемлекеттік функциялардың бір бөлігі жойылады не халыққа және бизнеске сапалы мемлекеттік цифрлық сервистерді (қызметтерді) ұсынуға қайта бағдарланады.

Сонымен қатар, заң жобасында «Астана Хаб» халықаралық технологиялық паркі мен «инновациялық технологиялар паркі» дербес кластерлік қорын шоғырландыру ұсынылады.

Бұл қолданыстағы даму институттарының базасында серпінді инновациялық жобалар мен перспективалы IT-стартаптарды мемлекеттік қолдаудың бірыңғай экожүйесін іске қосуға, it-саласын дамыту үшін қолайлы реттеуші жағдайлар жасау жөніндегі мемлекеттік саясаттың тиімділігін арттыруға мүмкіндік береді.

ҚР цифрлық даму, инновациялар және аэроғарыш өнеркәсібі министрі Бағдат Мусин Абай облысына жұмыс сапары аясында Abai it-Valley технологиялық кластеріне барды.

Бұл өңірлік IT-қоғамдастық ақпараттық-коммуникациялық технологиялар саласындағы әзірлемелерді оқытуға, өзара іс-қимылды іске асыруға арналған алаң.

Университет басшылығы мен «Abai IT-Valley» мамандары министрге технокластердің материалдық-техникалық базасын таныстырып, атқарып жатқан жұмыстары туралы әңгімеледі.

Құрылғанына бір жыл ғана болған Abai IT-Valley қазірдің өзінде жобаларын жүзеге асыруға 55 млн теңгеден астам қаражат тартқан. Бұл күні жүзеге асырылып жатқан «Агромайнинг», «Ұлттық нақыштағы 3D ойыншықтар шығару», «Виртуалды химия лабораториясы», «Өндірістегі қауіпсіздік техникасына оқытатын виртуалды тренажер-симулятор», «Туристерге арналған мобильді қосымша», «Медицина саласының студенттеріне арналған қолданбалы қосымша», «Компьютерлік ойындар мен анимациялық фильмдер әзірлейтін геймдев студия» жобалары таныстырылды. Жобаларды жүзеге асырушылар арасында - өз саласының майталманына айналған кәсіби мамандармен қатар Әлихан Бөкейхан Университетінің студенттері мен дарынды мектеп оқушылары да бар.

Бағдат Батырбекұлы Орта Азия аумағындағы ең ірі «Decentration» WEB 3.0 хакатонының ашылу салтанатына қатысты. Хакатон бір уақытта Қазақстанның 9 өңірінде өтіп жатыр. Іс-шараның Абай облысындағы орталығы - Әлихан Бөкейхан Университеті. Сонымен қатар осы университет базасында Қазақстанның Спорттық бағдарламалау федерациясының Абай облысындағы ресми өкілдігі ашылды.

Айта кетейік, IT оқыту саласы жас ұрпақ арасында танымал болып келеді. Қосымша білім ретінде Семей қаласында балаларға арналған 3 бағдарламалау мектебі жұмыс істейді. Бүгінгі таңда оқушылардың жалпы саны 400-ден асты.

https://www.gov.kz/memleket/entities/mdai/press/news/details/562735?lang=kk

ҚР Цифрлық даму, инновациялар және аэроғарыш өнеркәсібі министрі Бағдат Мусин 25 мамырда сағат 12:30-да Өскемен қаласының №3 Халыққа Қызмет Көрсету орталағында (мекен жайы: Белинский 37А көшесі) министрліктің құзыретіне кіретін мәселелер бойынша азаматтарды қабылдайды, сондай-ақ 25 мамырда сағат 15:00-де Д. Серікбаев атындағы Шығыс Қазақстан техникалық университетінде облыс тұрғындарымен кездесу өткізеді. 

Тұрғындармен кездесудің онлайн-көрсетілімі ҚР Цифрлық даму, инновациялар және аэроғарыш өнеркәсібі министрлігінің «Youtube» әлеуметтік желілеріндегі ресми парақшасында тікелей эфирде көрсетілетін болады.

Азаматтарды кездесуге белсенді қатысуға және ҚР Цифрлық даму, инновациялар және аэроғарыш өнеркәсібі министріне сауал жолдауға шақырамыз.

Министрліктің қызмет бағыттары: телекоммуникация және байланыс, «электрондық үкімет» және мемлекеттік көрсетілетін қызметтер, аэроғарыш өнеркәсібі, геодезия и картография, электрондық өнеркәсіп, цифрлық активтер индустриясы, ақпараттық қауіпсіздік, инновациялар.