|
Бүгін Тәжікстан Республикасының Душанбе қаласында өтіп жатқан халықаралық IT-форумда Қазақстан Республикасының Цифрлық даму, инновациялар және аэроғарыш өнеркәсібі министрі Жаслан Мәдиев пленарлық сессияда сөз сөйлеп, Қазақстанның цифрландыру және ақпараттық технологиялар саласындағы жетістіктерін таныстырды. Баяндамада ведомство басшысы жаһандану жағдайындағы экономикалық өсу үшін өзара инвестициялар мен халықаралық ынтымақтастықтың маңыздылығына тоқталды. Министр ұсынған басты жетістіктердің бірі – электронды үкімет саласындағы қазақстандық флагмандық өнім – «Интернет-ресурстардың бірыңғай платформасы» болды. Елдегі барлық мемлекеттік органдар үшін жасалған бұл платформа шамамен 4 миллион долларды үнемдей отырып, сервер, әзірлеуші және ақпараттық қауіпсіздік шығындарын айтарлықтай төмендеткен веб-сайт құрастырушы болып табылады. Бүгінде платформада Қазақстанның мемлекеттік органдарының 3 мыңнан астам веб-сайты салынған, оларға 35 миллионнан астам адам кірген. Бұл платформа – әзірлеушілерді тартпай 15 минут ішінде сайт құруға мүмкіндік беретін no-code шешімі. Аталған тәсіл тиімділікті едәуір арттырып, мемлекеттік органдардың интернет-ресурстарын әзірлеу мен қолдау шығындарын азайтты. 2023 жылдың желтоқсанында Қазақстан мен Тәжікстан Президенттері қол жеткізілген келісімдер аясында Қазақстанның электрондық үкімет саласындағы IT шешімдерін Тәжікстанға беру туралы келісімдерге қол қойылды. Бұл қадам екіжақты қарым-қатынастарды нығайтып, Тәжікстандағы цифрлық басқарудың дамуына ықпал етті. «Ұлттық ақпараттық технологиялар» АҚ мамандары тәжік әріптестерін мемлекеттік органдардың интернет-ресурстарының бірыңғай платформасымен жұмыс істеуге үйретті, бұл аталған елдің мемлекеттік органдарының 5 веб-сайтын құруға мүмкіндік берді. Атап айтқанда, Инновациялық және цифрлық технологиялар агенттігі, Қаржы министрлігі және басқа да негізгі бөлімдер. Қос ел арасындағы электрондық үкімет саласындағы білім мен технологиялар трансферті бойынша ынтымақтастық туралы меморандум аясында Astana Hub бағдарламалары арқылы Тәжікстаннан 100-ден астам жас мамандар 6 IT мамандығы бойынша білім алуда. Astana Hub және Google for Startups бірлесіп жүзеге асырып жатқан Silkway Accelerator бағдарламасы аясында Тәжікстанның стартаптары ауқымды және халықаралық нарықтарға шығудың бірегей мүмкіндіктеріне ие болып, айтарлықтай прогреске қол жеткізді.
|
