Бүгін Орталық коммуникациялар қызметінің алаңында ЦДИАӨМ өкілдері жасанды интеллектті дамыту тұжырымдамасы туралы айтты. Іс-шараға ҚР Цифрлық даму, инновациялар және аэроғарыш өнеркәсібі министрлігінің жасанды интеллект және инновациялар комитетінің төрағасы Ғиззат Байтұрсынов, Цифрлық үкіметті қолдау орталығының бас директоры Рүстем Бигари, Назарбаев Университеті ISSAI институтының сыртқы байланыстар жөніндегі директордың орынбасары Мадина Абдрахманова, сондай-ақ «ҰАТ» АҚ Басқарма Төрағасының міндетін атқарушы Дмитрий Мун қатысты. Спикерлер Қазақстанда жасанды интеллектті енгізудің стратегиялық көзқарасы, Жасанды интеллект Комитетінің қызметі жайлы және жасанды интеллектті дамыту үшін технологиялық инфрақұрылым құру туралы баяндады. ҚР Цифрлық даму, инновациялар және аэроғарыш өнеркәсібі министрлігінің жасанды интеллект және инновациялар комитетінің төрағасы Ғиззат Байтұрсынов мемлекет саясатын үйлестіру және жасанды интеллектті дамытуға қолдау көрсетуді тиімді жүзеге асыру үшін ЦДИАӨМ жанынан жасанды интеллект және инновациялар комитеті құрылғанын атап өтті. «Комитеттің негізгі міндеттері – есептеу қуаттары бар инфрақұрылымды құру, қазақ тілі моделі KazLLM құру, жасанды интеллектті қауіпсіз, жауапты және этикалық пайдалануға жағдай жасау, жасанды интеллектті салаларға енгізу, сондай-ақ адами капиталды дамыту. Жалпы, комитеттің қызметі цифрлық технологияларды дамытуға, түрлі цифрлық жобаларды интеграциялауға, цифрлық трансформацияға және цифрлық шешімдерді дамытуға бағытталады», - деді Ғиззат Байтұрсынов. Сондай-ақ жасанды интеллект тұжырымдамасы ұсынылды. Оның негізгі мақсаты жасанды интеллект экожүйесін құру, экономика салалары мен мемлекеттік басқаруға жасанды интеллект технологияларын кеңінен енгізуге назар аудару болып табылады. Инфрақұрылымды дамыту аясында жүйелі шаралар көзделген: Қазақстанда суперкомпьютер орналастыру, халықаралық серіктестермен бірлесіп деректерді өңдеу орталықтарын салу, ұлттық жасанды интеллект платформасын құру және талшықты-оптикалық байланыс желілерін (ТОБЖ) дамыту. Адами капиталды дамыту аясында жасанды интеллект экожүйесін дамыту үшін кешенді инновациялық инфрақұрылым әзірленуде. Ел бойынша «peer-to-peer» әдістемесімен, яғни оқытушылардың қатысуынсыз жобаларды жүзеге асыру арқылы практикалық оқытуға негізделген бағдарламалау мектептерін іске қосу жоспарлануда. Бұл студенттердің өзара әрекеттесуіне және зерттеу тәсіліне ықпал етеді. Халықаралық компаниялармен және институттармен ынтымақтаса отырып, елде зерттеу орталықтарын құру жасанды интеллект саласындағы ғалымдарға озық серіктестермен жұмыс істеуге мүмкіндік береді. Халықты кеңінен қамтудың маңызды құралы ұлттық және халықаралық іс-шараларды, мысалы форумдар мен конференциялар, демо-күндер, ғылыми конференциялар, өңірлік роуд-шоулар, көрмелер мен хакатондарды ұйымдастыру және қатысу болып табылады. Мақсатты индикатор – жасанды интеллект бойынша білім беретін ЖОО үлесін 2025 жылы 20%-дан 2029 жылы 60%-ға дейін арттыру. Акселерациялық бағдарламалар IT нарығында кәсіпкерлік белсенділіктің өсуі арқылы мультипликативті әсер етеді. Бизнес қауымдастығын барынша кеңінен қамту үшін есептеу қуаттарына, дерекқорларға, деректер жиынтықтарына, бұлтты есептеулерге жеңілдіктерге және т.б. қолжетімділікті көздейтін жасанды интеллект экожүйесін құру қажет. Экожүйені дамыту аясында халықаралық компанияларда (Microsoft, Google, Booking және т.б.) жұмыс істейтін қазақстандық мамандардан құралған Ұлттық жасанды интеллект командасы құрылды. 2029 жылға қарай экономика салаларында кемінде 25 жасанды интеллект өнімін жыл сайын іске асыру мақсаты қойылған. ҚР ЦДИАӨМ баспасөз қызметі |