|
Мемлекет басшысы Sinovation Venture жасанды интеллект институтының президенті, доктор Ли Кай-Фумен кездесуде озық технологияларды енгізудің стратегиялық маңызын атап өтті. Сондай-ақ әлемдегі жетекші сарапшылармен тәжірибе алмасу цифрлық трансформациядағы өршіл мақсаттарға қол жеткізуге ықпал ететінін айтты. Қасым-Жомарт Тоқаев пен Ли Кай-Фу жасанды интеллектті білім, денсаулық сақтау, энергетика және қоғамдағы басқа да түрлі салаларда пайдалану бойынша пікір алмасты. Қытай мен АҚШ елдерінде жасанды интеллект саласын дамытуда және бағдарламалық өнімдер әзірлеуде бай тәжірибесі бар Ли Кай-Фу Қазақстанның IT бастамаларды енгізу, бәсекеге қабілетті технологиялық экожүйе құру ісіндегі әлеуетін жоғары бағалады. |
|
Биыл 31 қаңтар мен 1 ақпан аралығында Алматы қаласында Digital Almaty 2025 халықаралық цифрлық форумы өтеді. Іс-шара аясында стартаптар Industry 4.0 AI Battle және Astana Hub-тың Best AI-стартап номинациясы бойынша жарысқа түсіп, бақ сынай алады. Бұл бастамалар инновациялық шешімдер мен технологиялар үшін жаңа мүмкіндіктер ашып, стартаптарға жасанды интеллект негізіндегі алдыңғы қатарлы шешімдерін паш етіп, қомақты сыйлықтар ұтып алу мүмкіндігін ұсынады. INDUSTRY 4.0 AI BATTLE Форум аясында Industry 4.0 AI Battle — жасанды интеллект (ЖИ) саласындағы ең үздік стартапты анықтайтын ауқымды бәсеке өтеді. Осы ретте стартаптарды ЖИ негізіндегі үздік шешімдерін көрсетіп, дамуға үлес қосатын мүмкіндіктерді иеленуге шақырамыз. Қатысудың 4 басты себебі:
Баттл бағыттары: Industrial Automation, Computer Vision and Video Analytics, Big Data, Predictive Analytics, Deep Learning, Drones/UAVs, Robotics, Industrial Safety, Machine Learning, IoT, Ecology, Fintech, Medtech, Cyber Security. Жеңімпаздар төрт номинация бойынша анықталып, әрқайсысы 15 000$ көлемінде қаржылай сыйлықпен марапатталады:
Толық ақпарат пен өтінім беру формасы мына сілтеме арқылы қолжетімді. BEST AI-СТАРТАП Сонымен қатар, форумда Astana Hub-тың Best AI-стартап номинациясы бойынша жеңімпазды анықтаймыз. Бұл — жасанды интеллект негізінде шешімдер әзірлеу және енгізу саласында айтарлықтай жетістіктерге жеткен стартаптарды қолдауға бағытталған бастама. Бақ сынау үшін стартаптар MVP деңгейінде немесе одан жоғары жұмыс істейтін AI өнімін ұсынуы қажет. Өтінімдер 15 қаңтарға дейін мына сілтеме арқылы қабылданады. Еске салсақ, Digital Almaty шарасын ұйымдастырушылар: ҚР Цифрлық даму, инновациялар және аэроғарыш өнеркәсібі министрлігі, ҚР Сыртқы істер министрлігі, Алматы қаласының әкімдігі және «Инновациялық технологиялар паркі» дербес кластерлік қоры. |
|
Ana tili газетіне берген сұхбатында Қазақстан Президенті Қасым-Жомарт Тоқаев еліміздегі цифрлық технологиялар мен жасанды интеллекттің даму перспективаларына тоқталды. Цифрландыру мен IT қызметтері Президент еліміздің жаһандық цифрлы көшпенділер үшін қолайлы мемлекетке айналып келетінін атап өтті: «Қазақстаннан экспортталатын ІТ-қызметтер саны артып келе жатқаны көңіл қуантады. Astana Hub табысты жұмыс істеп тұр. Бұл технопарк бір жарым мыңнан астам компанияның басын біріктіреді. Оның үштен біріне жуығы – шетелдік компания. Осылайша, еліміз жаһандық цифрлы көшпенділер үшін қолайлы мемлекетке айналып келеді». Жасанды интеллект: жобалар мен мүмкіндіктер Еліміздің басым бағыттарының бірі – жасанды интеллект (ЖИ) технологияларын дамыту. Қасым-Жомарт Тоқаев KazLLM цифрлы тіл моделінің алғашқы нұсқасын бұл бағыттағы маңызды қадам екенін атап өтті. «Қазақстан Еуразия кеңістігіндегі ең ірі цифрлы хабтың бірі бола алады. Оған мүмкіндігіміз толық жетеді. Ол үшін жасанды интеллект технологияларын дамыту керек. Болашағы зор жобалар қазірдің өзінде бар. Мысалы қазақ тілінің KazLLM атты цифрлы тіл моделінің алғашқы нұсқасы жасалды. Бұл – қазақ тілінде ойлап, сараптама жасап, қазақша сөйлесе алатын жасанды интеллект. Осы бағыттағы жұмыстар жалғаса береді. Жыл соңына дейін жасанды интеллектінің Alem.AІ атты халықаралық орталығы ашылады. Бұл орталық инвестиция тартатын, әлемдік тәжірибені және инновацияларды енгізетін орынға айналуы керек». AI болашағы: қоғам өміріне әсері Қасым-Жомарт Тоқаев жасанды интеллект алдағы жылдары өте қарқынды дамып, жұрттың өмір туралы ұғымын, тіпті тұрмыс-тіршілігін де түбегейлі өзгертетініне тоқталды. «Милы машиналар, яғни интеллектісі жағынан адамды он орайтын роботтар пайда болатын күн алыс емес. Оның үстіне бұл роботтар эмпатияға, яғни сезіну және эмоция білдіру сияқты адамға тән қасиеттерге ие болады. Жастарға мектептерде, колледждер мен жоғары оқу орындарында жасанды интеллект технологияларын қолдана білуді үйрету маңызды. Былтыр еліміздің 15 университетінде Google компаниясының жасанды интеллект жөніндегі курстары енгізілді. Осы саланың мамандарын даярлау үшін арнайы бағдарлама әзірлеу мәселесі пысықталып жатыр (AI-Sana)». Нейро желілер тәуекелдері мен заңмен реттеу қажеттілігі «Нейрожүйелердің пайдасы ұшан-теңіз болғанымен, одан туындайтын қатерлер де бар. Мысалы, алаяқтар фото-бейнежазбалар жасап, адамның дауысын келтіру үшін де соны пайдаланады». Президент бұл технологияларды заңмен реттеу қажет екеніне баса назар аударды: «Біздің депутаттарымыз да жасанды интеллект туралы заң әзірлеу керек деп бастама көтерді. Осы маңызды жұмыспен тиянақты түрде, мұқият айналысу қажет. Жасанды интеллектіні жауапкершілікпен қолдану қағидаларын жасап, оның этикалық мәселелерін жан-жақты ойластыру керек. Бірақ осы саланы реттегенде жасанды интеллектіні шектеуге емес, керісінше, оны дамыту жағына мән берілуге тиіс. Бұл технологияларды кеңінен қолданысқа енгізу орасан зор мүмкіндіктерге жол ашады. Оны қалт жібермей, игілікке жарату қажет». Сұхбаттың толық нұсқасын оқу үшін сілтемеге өтіңіз. |
|
2024 жылдың 27 желтоқсанында «Ұлттық ақпараттық технологиялар» АҚ (ҰАТ) алғашқы облигацияларын Қазақстан қор биржасына (KASE) сәтті орналастырды. Компания жылдық 19% мөлшерлемемен 3 миллиард теңгені тартты. Облигацияларды орналастыру ҰАҚ-ға қарыз капиталы нарығына шығуға мүмкіндік берді, бұл компанияның дамуы үшін маңызды қадам болды. Жиналған қаражат Қазақстанның мемлекеттік органдарының жұмысын қамтамасыз ететін ақпараттық-коммуникациялық қызметтердің инфрақұрылымын дамытуға жұмсалады. Облигация – компанияларға даму үшін қаражат тартуға мүмкіндік беретін қарыздық құнды қағаз. Облигацияны сатып алған инвестор тұрақты пайыздық кіріс алады. Компанияның облигацияларына NITCb1 сауда коды берілген. Алғашқы пайыздық төлем 2025 жылдың маусымында күтілуде. «Ұлттық ақпараттық технологиялар» АҚ – Қазақстан Республикасының мемлекеттік органдары үшін цифрлық шешімдердің жетекші жеткізушісі. Компания 2000 жылы құрылып, ақпараттық-коммуникациялық қызметтер көрсету саласында маманданады. Компания жүзеге асыратын жобалар қатарында – «электронды үкімет» порталы, е-Лицензиялау, мобильді қосымша «eGov Mobile», Smart Bridge жобасы және басқалары бар. Толық ақпарат Қазақстан қор биржасының ресми сайтында қолжетімді. |
|
Қымбатты отандастар!
Сіздерді Жаңа жыл мерекесімен шын жүректен құттықтаймын! Бүгін бәріміз жүзжылдықтың ширек ғасырлық белесіне қадам басқалы тұрмыз. Биыл Алтай мен Атырау арасындағы барша жұрт тарихтың жаңа парағын бір мезетте ашады. Халқымыз екі жылдың тоғысар тұсын ізгі ниетпен, ерекше көңіл-күймен күтеді. Өткен күндерді саралап, ескі жылға баға береді. Арман-мақсатын айқындап, болашаққа үлкен үмітпен қарайды. Бұл – нағыз отбасылық мереке. Сондықтан мен баршаңызға, ең алдымен, еліміз аман, жұртымыз тыныш, бауырымыз бүтін болсын дегім келеді. Ұлу жылы ұлтымыз үшін маңызды оқиғаларға толы болды. Түрлі саладағы реформалар жемісін бере бастады. Экономиканың жаңа бағдарын белгілеп, нақты шараларды қолға алдық. Өңдеу өнеркәсібі қарқынды дамуда. Бірқатар ірі өндіріс орны ашылды. Инвестициялық ахуал жақсарды. Мыңдаған шақырым жол салынып, жөнделді. Еліміздегі ең ұзын көпірдің құрылысы аяқталып, халық игілігіне берілді. Диқандарымыз мол астық жинап, қамбаны дәнге толтырды. «Таза Қазақстан» акциясының аясында қалалар мен ауылдар жаңаша келбетке ие бола бастады. Алғаш рет азаматтарымыздың орташа өмір сүру ұзақтығы 75 жасқа жетті. Өскелең ұрпақтың жарқын болашағы үшін ауқымды жұмыс атқарылып жатыр. Ұлттық қордағы қаржының бір бөлігі балалардың есепшотына түсті. Жүзден астам жаңа мектеп ашылды. Көптеген әлеуметтік нысан салынды. Парламент депутаттары қоғамдағы өзекті мәселелер бойынша заңдар қабылдады. Сондай-ақ биыл біз еліміздің келешегіне айрықша әсер ететін өте маңызды шешім қабылдадық. Атом электр станциясына қатысты референдум өткіздік. Көпшілік бұл бастамаға қолдау білдірді. Қазақстанның әлемдік аренадағы абыройы арта түсті. Астанада беделді халықаралық ұйымдардың маңызды саммиттері өтті. Дүниежүзілік көшпенділер ойындарына мыңдаған спортшылар мен меймандар келді. Байрақты бәсекені табысты ұйымдастырып, төл өркениетімізді жер жүзіне таныттық. Спортшыларымыз Олимпиада және Паралимпиада ойындарында көк туымызды биікте желбіретті. Оқушыларымыз түрлі білім сайыстарынан жүлделі оралды. Басқа да көптеген табыс бар. Биыл көктемде бірқатар аймақта алапат тасқын болғанын білесіздер. Табиғаттың тосын сынағы бәрімізге ауыр тигені сөзсіз. Соған қарамастан, қиын күндерде халқымыз бір-біріне жанашыр болып, мызғымас бірлігін көрсетті. Зардап шеккен барша азаматқа жан-жақты көмек берілді. Мемлекет ешкімді назардан тыс қалдырған жоқ. Барлық міндеттемесін толық орындады. Жүздеген отбасы Жаңа жылды жаңа шаңырақта қарсы алып жатыр. Біз осылайша ырысты ынтымағымыздың арқасында барлық қиындықты еңсереміз. Алға сеніммен қадам басамыз. Жүйелі реформалар одан әрі жалғасады. Жоспарымыздың бәрі ойдағыдай орындалады. Алдағы жыл бұдан да табысты болады. Мен Президент ретінде бұған бар күш-жігерімді саламын. Үкімет тиімді жұмыс атқарып, экономиканың қарқынды өсімін қамтамасыз етуге тиіс. Жаңа өндіріс орындарын ашып, бизнеске қолайлы жағдай жасау қажет. Жол салуды жалғастырып, коммуналдық саладағы түйткілді мәселелерді шешу керек. Цифрлық технологияларды, соның ішінде жасанды интеллектіні қолдану аясын кеңейткен жөн. Ауыл еңбеккерлерін барынша қолдау маңызды. Басты мақсатымыз – азаматтардың әл-ауқатын арттыру. Мемлекет білім беру және денсаулық сақтау, ғылым және мәдениет салаларын дамытуға баса мән береді. Біз жаңа мектептер мен ауруханалар салып, педагогтердің, дәрігерлердің, ғалымдар мен мәдениет қайраткерлерінің мәртебесін көтере береміз. Жастарға да міндетті түрде қолдау көрсетеміз. Келесі жылы елімізде бірнеше айтулы оқиға болады. Біз Ұлы Жеңістің 80 жылдығын лайықты атап өтеміз. Ата Заңымыздың және Қазақстан халқы Ассамблеясының отыз жылдық мерейтойларын жоғары деңгейде өткіземіз. Сондай-ақ ұлы Абайдың 180 жылдық мерейтойын лайықты атап өтуіміз керек. Мен алдағы жылды «Жұмысшы мамандықтар жылы» деп жарияладым. Бұл – еңбек адамдарына деген ерекше құрметтің белгісі. Біз отаншылдық, еңбекқорлық және біліктілікке айрықша мән береміз. Дәл қазір мерекеге қарамастан мыңдаған отандасымыз жұмыс істеп жатыр. Олардың арасында шекарашылар, дәрігерлер, тәртіп сақшылары, құтқарушылар мен өрт сөндірушілер, өндіріс басындағы мамандар және басқа да азаматтар бар. Мұны өз ісіне деген адалдықтың нағыз үлгісі деуге болады. Мен бүкіл халқымыздың атынан Сіздерге шынайы ризашылығымды білдіремін. Шетелде білім алып жатқан немесе жұмыс істеп жүрген азаматтарымызға амандық тілеймін! Қадірлі ағайын! Осы мерекелік сәтте мен әр шаңыраққа шаттық тілеймін! Жаңа жыл әр азаматқа жақсылық әкелсін! Төрт құбыламыз түгел болсын! Ардақты аналарымыз бен ардагерлеріміз аман болсын! Жас ұрпақтың жолы ашық, болашағы жарқын болсын! Қастерлі Отанымыз өсіп-өркендей берсін! Жаңа жылда баршаңызға амандық, бақ-береке тілеймін! Әр үйде қуаныш көп болсын! Сіздерге мықты денсаулық тілеймін! Ырыс-несібелеріңіз арта берсін! Жаңа жыл құтты болсын! |
